कोल्हापूर इंजिनिअरिंग असोसिएशनच्या सदस्य उद्योजकांना आंतरराष्ट्रीय व्यावसायिक सहकार्याची संधी कोल्हापूर, दि. १८ ऑक्टोबर २०२६ : भारतातील आणि जर्मनीतील औद्योगिक क्षेत्रांमध्ये व्यावसायिक सहकार्य वाढविण्याच्या दृष्टीने कार्यरत असलेल्या GTsetu या जागतिक बी टू बी (B2B) सहयोग प्लॅटफॉर्मचे प्रतिनिधी श्री. जय जोशी यांनी कोल्हापूर इंजिनिअरिंग असोसिएशनच्या (KEA) पदाधिकाऱ्यांची भेट घेऊन संस्थेच्या कार्याची तसेच भारत-जर्मनी ऑटोमोबाईल कॉरिडॉर उपक्रमाची माहिती दिली. GTsetu हे विविध देशांतील पडताळणी केलेल्या कंपन्यांना एकत्र आणणारे जागतिक व्यासपीठ असून, त्याद्वारे कंपन्यांना संभाव्य आंतरराष्ट्रीय व्यावसायिक भागीदार शोधणे, तंत्रज्ञानविषयक सहकार्याच्या संधी उपलब्ध करून घेणे आणि परस्पर व्यावसायिक संबंध विकसित करणे शक्य होते. विशेषतः ऑटोमोबाईल, इंजिनिअरिंग आणि उत्पादन क्षेत्रातील भारतीय व जर्मन कंपन्यांमध्ये सहकार्याचे नवे मार्ग खुले करण्याचा या उपक्रमाचा उद्देश आहे. या उपक्रमांतर्गत GTsetu ने जर्मनीतील ब्रँड्ट अँड पार्टनर्स यांच्याशी भागीदारी केली आहे. या माध्यमातून भारतीय कंपन्यांना जर्मन उद्योगांशी संपर्क साधता यावा, तंत्रज्ञानाची देवाणघेवाण करता यावी तसेच संभाव्य व्यावसायिक भागीदारी आणि आंतरराष्ट्रीय बाजारपेठांमध्ये विस्ताराच्या संधी शोधता याव्यात, यासाठी प्रयत्न करण्यात येत आहेत. जर्मन उद्योग प्रतिनिधींचा भारत दौरा ब्रँड्ट अँड पार्टनर्सचे प्रतिनिधी श्री. मथियास श्मेल्टर हे दि. १५ ते २९ नोव्हेंबर २०२६ या कालावधीत भारताच्या दौऱ्यावर येणार आहेत. या दौऱ्यादरम्यान पात्र भारतीय कंपन्यांना प्रत्यक्ष भेटून त्यांच्याशी व्यावसायिक सहकार्याच्या शक्यता तपासण्याची त्यांची योजना आहे. त्यामुळे कोल्हापूरमधील ऑटोमोबाईल, अभियांत्रिकी आणि उत्पादन क्षेत्रातील उद्योजकांना जर्मन कंपन्यांशी संपर्क प्रस्थापित करण्याची संधी उपलब्ध होऊ शकते. या बैठकीत GTsetu च्या कार्यपद्धतीची सविस्तर माहिती, कंपनी पडताळणी प्रक्रिया, भारत-जर्मनी ऑटोमोबाईल कॉरिडॉरची उद्दिष्टे, आंतरराष्ट्रीय भागीदार निवडीची प्रक्रिया आणि संभाव्य व्यावसायिक व तंत्रज्ञानविषयक सहकार्याच्या संधी याबाबत मार्गदर्शन करण्यात येणार आहे. तसेच उद्योजकांच्या शंकांचे निरसन करण्यासाठी प्रश्नोत्तर सत्रही आयोजित करण्याचे प्रस्तावित आहे. कोल्हापूर जिल्ह्यातील अभियांत्रिकी आणि उत्पादन उद्योगांना आंतरराष्ट्रीय बाजारपेठांशी जोडणे, आधुनिक तंत्रज्ञानाची देवाणघेवाण वाढविणे आणि जागतिक स्तरावरील व्यावसायिक संबंध विकसित करणे या दृष्टीने हा उपक्रम महत्त्वपूर्ण ठरू शकतो. या पुढील बैठकीमुळे KEA च्या सभासद उद्योजकांना भारत-जर्मनी औद्योगिक सहकार्याच्या संभाव्य संधी अधिक सविस्तरपणे जाणून घेता येणार आहेत. याबैठकीस अध्यक्ष कमलाकांत कुलकर्णी, उपाध्यक्ष श्रीकांत, ऑन.सेक्रेटरी नितीन वाडीकर, जय जोशी, आर्यन तोरो, अभिषेक शर्मा, प्रशांत मोरे, प्रदीप व्हरांबळे इ.उपस्थित होते.